Rokofske proščejne
K svetemu Roku mi denes smo došli
Kak i naši dedi pred stuočetrdesetpet liet,
Ki za falu svecu napravili su hram ovaj
Jerbo je pomogel da hudi kužni beteg
Hametem ne pohara naš bistrajnski kraj.
Mi se za spomenek i za falu svecu
Sake lete zijdemo baš tu na dan ovaj,
Pak svetega Roka molimo da i denes čuva
od betega sakega,
Cielu našu faru – naš podslemenski kraj.
Na denešne svečanosti
Pred kipem mučenikovem
Molimo se svecu, popievamo na čast
Za pomoč se utiečemo
Naj i dale čuva, i brani od zla nas.

Vera Grgac (iz zbirke Bistra stara i naša, 2009.)